menu
February 19, 2019
Yolanda Oosthuizen se getuienis (hulle is gered uit die see)

Die afgelope Sondagoggend rondom 10:30 het Yolanda Oosthuizen (53) en Anne Tait (67), twee sendelinge van Skotland wat in Suid-Afrika kuier, by Lappiesbaai by Stilbaai gaan swem. Binne minute het hulle in ’n sleurstroom beland wat hul al dieper die see-ingetrek het. Toe Yolanda sien dat Anne nie meer haar kop bó die water kan hou nie, het sy op haar hardste om hulp begin roep.

 

’n Entjie weg het die 12-jarige Mialize Wessels, Yolanda se hulpkreet gehoor. Sy het dadelik vir haar ma gesê dat hulle die vroue moet gaan help. Haar ma was nog besig om die Nasionale Seereddingsinstituut te bel, toe  die 16-jarige, Dewald van der Merwe wat saam met hulle daar was, sy lyfplank opgetel het en die see ingehardloop het om die vroue te gaan red.

 

Omdat Yolanda vir Anne verloor het, wat al dieper die see ingespoel is, het sy net aanhoudend bly bid, “Jesus, Jesus, help asseblief vir Anne! Red ons hieruit.” Dewald het Anne net betyds bereik. Met haar laaste krag het sy aan sy plank vasgehou, terwyl hy geswem het vir al wat hy werd was om haar by die strand te kry. Nog ’n branderplankryer op die toneel het vir Yolanda ook tot op die strand gehelp.

 

Dokters het die vroue op die strand bygestaan en Anne na die hospitaal in Mosselbaai geneem weens die water op haar longe. In reaksie op hul belewenis, sê Yolanda: “Ek het al Stilbaai se helde op een dag ontmoet. Die seun was ’n engel op ’n lyfplank en hy en die ander is deur die Here gestuur. Dit is ’n wonderwerk dat ons oorleef het en alle eer gaan aan die Here.”


Los jou kommentaar en laat weet my wat jy dink

3 persone het gereageer.

  1. Elisabeth Louw says:

    Good is good all the time,Al die loof en eer kom die Vader toe.

  2. H Dup says:

    Amen ons God leef

  3. Tertia Eksteen says:

    Aan God kom toe al die lof en die eer…… Haleluja! Amen

Leave a Reply

Your email address will not be published. Required fields are marked *